Вай мехка тӏалатташ бола туристаш, хӏара шера дукхагӏа хулаш латт
Гӏалгӏай мехках бӏаргтоха, цун хозалца дог диза ловш бола туристаш хӏара шера дукхагӏа хулаш латт. «Сердалога» из хоам бера Мехкадаь зарбан болх лелаберашкара. Кердача шерца дувзаденнача салоӏача деношка вай мехка вера тайп-тайпарча моттигашкара 4000 совгӏа саг. 53%-га кхоачаш йиза латтар республикера гостиницаш, хьаьшашта лаьрхӏа дола цӏенош. Белгалде деза, дӏадахача шерга хьежача, из хьал дикка айденнилга. 2025-ча шера вай мехкарча моттигех бӏаргтохаш хилар 125 эзар совгӏа саг.
«Нах эггара чӏоагӏагӏа тӏаозар гӏалай моттигаша ший тайпара хетийта лоаме я. Цигара цӏена фо, лоаман наькъаш, тхьоврача къаман доккхача исторе теш хинна латта гӏалаш йолчахьа гӏерташ хул берригаш. Машинашца болхараш, иштта гӏаш лела ловраш кӏезига хилац лоаме. Цигарча ӏаламах тамаш еш хул дуккхабараш», - белгалдир вай мехкадас Келаматанаькъан Махьмуд-ӏаьлас, туризмах дувцаш.
Мехкарча экономически хьалаца дувзаденна из гӏулакх тоадеш латт тахан. Зем-гӏалага, Гаьл-чӏож яхача кхуркхолгага, Ушкорт яхача лоаманга бодаш кхо никъ хьабийллаб цу лакхе. Дикка баьржа ба туристашта юкъе машинацара никъ а. Иштта йоккха терко лоаттаю вай мехка тӏема-патриотически а ӏилман а оагӏонцарча туризма. Из хьаллоац археологически, гӏалаш меттаоттаярах йолча ишкола балхаша.
Мехкадас белгалдир, туризм вай мехка лоархӏаме йолга. Цу оагӏонца дувзаденнараш тоадаро болх бе керда моттигаш хулийт, мехкарча экономикан хьал айду. Цул совгӏа, дерригача дунен дӏабовз вай хоза, беркате, хьаьша геттара лоархӏаш, везаш бола мохк. Укх тӏеххьарча итт шера туристаш пхезза дукхагӏа латт вай мехка. Мехка кулгалхоша боккха болх дӏахьош къахьегаш латт тахан, из гӏулакх кхы а дикагӏа тоадара тӏехьа, Россена чуйоагӏаш мел йолча моттигашта вай гӏалаш, лоамаш, тамашийна дола ӏалам, иштта беркате бола нах дӏабовзаргболаш.
