Халкъашта юкъера наьна метта ди дездеш ба вай мехка
Мехктохкама музее дӀайихьар наьна метта хетаяь кхетаче. Из хоам «Сердалога» бир цу моттигера. «Цига гулбеннабар Республикерча йоазонхой Союза кулгал деш вола Ноакастхой Хаваж, «Юхь къайлагӀа лоаттаераш» яха проект кхелла Матенаькъан Илез, къаман кхоллама цӀен методист Йовлой Илез, иштта наьна меттаца къахьегаш хьабоагӀа кхыбараш а», - йоах хоамо.
Берий беша болхло йолча Новразанаькъан Марета ше вӀашагӀдехка берий кхетам лакхбеш дола ловзаргаш гойтар цига. Бераш санна, цар ноаной а ба цу юкъе дакъа лоацаш.
Россе къамий меттаех болча оагӀон интернет - энциклопеде редактор йолча Маккас берашта ше яздаь «Боамби», «Гургал», «Шоана бераш» яха книжкаш довзийтар цига.
Наьсарерча № 2 йолча ишкола дешархоша, наьна мотт хестабеш йола байташ ешаш, дӀайихьар кхетаче.
