Моттигера доалахьара къахьегам дика дегӀабоагӀаш хилар, белгалдир ГӀалгӀай мехка
Хоалуш да моттигашка зӀамига, юкъера доалахьара къахьегам дегӀабоагӀаш хилар, карарча шера из 16% дукхагӀа ба 2023 шера баьча балхал, йоах ГӀалгӀай Республикан Паччахьалкхено Парламента хьалхашка кхайкабаьча хоама тӀа, аьлар «Сердало» газетага.
«2024 шу долалуш, из болх дукхагӀа баьб 6,3 эзар зӀамигача, юкъерча доалахьарча моттигашка, из 16 % дукхагӀа ба 2023 шера баьчул (5,5 эзар). Цига болх беш бола нах а тӀакхийттаб, хӀанз уж ва 8 эзар саг - цун дегӀадар 4,5%.
Цу юкъа шоай доалахьара хӀама хьадийлла боахка нах шозза дукхагӀа хиннаб - 16,5 эзар саг (01.01. 2023 - 9,6 эзар саг)», - аьлар республикан ах паччахь волча Сластенин Владимира, ГӀалгӀай Республикан Халкъа Гуллама хьалха къамаьл деш.
Цо иштта белгалдир паччахьалкхено вай мехка зӀамига, юкъера доалахье дегӀайоалаяра ахчанца новкъостал деш хилар, иштта, доалахье лелаеча къоначар дӀадоладаь хӀама хьаллоацаш, терко лоаттаю. Белгалдир, уж декхараш дика кхоачашдергда, йоал яккхара боарам лаьгӀбеш хуле. Карарча шера, наджгоанцхой бетта 1-ча дийнахьа денз, республике йоал яккхара боарам 6%-ра 2 %-га кхоачаш лохбеннаб, иштта ИП организацеш луш йола йоал а кӀезигагӀа я, леладеча Ӏаьдала хӀамах йоал ялара гӀулакх дикка царна аттача даьккхад.
ГӀалгӀайченна чӀоагӀа лоархӀаме да, социально-экономически даькъ тӀа вай республика дегӀайоалаяра, къаьстта ше арахецаш дола хӀама.
