Цхьацца кхачан маьхаш хувцалуш латт мехка тахан
Цох лаьца язду Юртабоахама министерствос ший Телеграм-оагӀон тӀа, республикерча Россе Банка оагӀон хоама тӀатовжаш, Ростата белгалдер юкъелоацаш. 2024-ча шера лаьттача хьалага хьежача, укх шера маьхаш хувцаденнад. «Аьтинга бетта мах айбеннар е дарегӀа бийрзар малагӀа кхача ба?
2023-ча шерарча маьцхали бетта 0,4%-га кхоачаш лохделар мехкара маьхаш. Аьтинга бетта лаьгӀделар шерара хӀама дездалар а – 9,6%- гара маьтсела бетта 8,3%-га кхоачаш», - йоах республике фу дезденнад, малагӀа хӀама дарегӀа дийрзад белгалдеча хоамо.
Фуий мах Ӏобаьннаб вай мехка из кхоачам дикка хьабаржарах - 15,1% цхьан бетта, 38,4% - шера. Вайна дагайоагӀа фуаш дикка дезденна хинна ха. Мах Ӏобаьннаб иштта сомашта, хаьсашта керда беркат хьадаржарах. Хударий мах кӀезигагӀа ба тахан, 0, 29%-га кхоачаш дарегӀа дийрзад уж. Вай мехкара Ӏалашо бахьан долаш да из а. ЧӀоагӀа лоархӀаме да цу юкъе газомоторни доагор хилар а.
ХӀара шера хулача беса, цхьацца долча хӀамай маьхаш урагӀдахад. Барзкъашта, маьчешта, дарбанчешка эшаш йолча хӀамашта мах тӀакхийттаб. ЦӀеношка цхьацца хувцамаш дар, таксеца дӀа-хьа вахар, автобусаша боаккхаш бола мах тахан лакхагӀа ба. Цу оагӀонцарча болхлоша теркалдечох, цхьацца хӀамашта маьхаш лохдалар тайп-тайпарча бахьанашца дувзаденна да, цу юкъе да из кхоачам сов дика дӀабодаш цахилар а. ХӀаьта хӀара дийнахьа тикашка, базарашка леларашта лоархӀамедар – цӀаьхха, маьхаш айлуш дола хӀама цахилар, цу гӀулакхо чӀоагӀа Ӏоткъам бу бахархошта.
