Прокуратуран 304 шу дизар дездир вай мехка
Прокуратуран 304 шу дизар дездир вай мехка. Из хоам «Сердалога» бир цу моттигера. Цӏай дездеча кхетаче гулбеннабар прокуратуре къахьегараш, ветеранаш, иштта лоархӏаме хьаьший.
Российски Федераце, Гӏалгӏай республикан гимнаш локхаш; дӏайолайир из кхетаче. Видеога гӏолла берригаш даькъалабувцаш, къамаьл деш вар РФ Керттера прокурор вола Гуцан Александр Владимирович. Шоай болх боаггӏача боараме дӏабихьараш РФ Керттерча прокурора амарца, вай мехкарча прокурора амарашца белгалбир.
Республикерча прокурора Васильченко Андрейс ший къамаьла юкъе теркалдир, прокуратура укх массайтта шера мехка нийсхо лоаттаяра тӏехьа лоархӏаме, боккха болх дӏахьош хьайоагӏилга. Цу оагӏонца къахьегараш къаьстта чӏоагӏа белгала хиннаб бокъонаш лораяра, хӏама кега ца далийтара тӏехьа дӏахьоча балха юкъе.
«Гӏалгӏай республикерча прокуратуранна карагӏдаьннараш тахан кӏезига дац, ма дарра аьлча, доаккхал де мегаргдолаш да. Боаггӏача боараме, бехктокхаме шоай болх дӏахьош лаьттаб прокуратуран къахьегамхой. Цу юкъе да шоай гӏулакх дика довзаш, шаьрдаь хилар, хӏама тоадара тӏехьа латтар»,- аьлар Васильченко Андрейс.
Иштта кхетаче гулбеннараша дагалаьцар 2004-ча шера зуламхоша даьча хатара юкъе вахар хаьда болхлой. Цу юкъе ба Наьсарера прокурор Бузуртанаькъан Мухарбик, цун гӏончаш хинна ӏарпенаькъан Адам, Ведажанаькъан Микаил, прокуратуран къаьстта лоархӏамеча гӏулакхий тохкама болхло хинна Гетагӏазанаькъан Тимур, Наьсарен кхален прокурор Озанаькъан Билан; иштта 2009-ча шера вахар хаьда, прокурора воккхагӏа вола гӏонча хинна Тӏоаршхой Ахьмад.
