ГӏалгӀай мехка белгалдир Росгварде урхаллен 9 шу дизар
27.03.2025 16:08
Къаман гварде бӀун 9 шу дизар белгалдир цун болхлоша, яхаш, хоам бу «Сердало» газетага из кхетаче вӀашагӀъеллараша.
Хьалхарча аргӀагIа доал деча даькъ тӀарча кулгалхочо, полице инарал-майора Буружанаькъан Микаила даькъалабийцар цу цӀайца балха новкъостий, иштта цо йовзийтар бӀухой а Росгварде кулгалхой а даькъала бувцаш йола Российски Федераце Президентагара телеграмма.
Дика къахьегарах, цхьаболча болхлошта паччахьалкхен, моттигерча урхаллен совгӀаташ делар.
Бӏун ветеранаша а даькъалабийцар доазон тӀарча балха новкъостий сийрдача кхоаненца, дӀайхача дешашца.
Белгалду, кхетаче чакхйоалаш сийленга тӀа зизаш даьхкар, бейнарий сий деш.
