Тайп-тайпара кулгаговзал йола нах белгалбир мехка
Къаман культуран оагӀув хьаллоацаш, шоай кулгашца тайп-тайпара хӀамаш хьакхоллаш бола говзанчаш белгалбир къаман кагирхой политикани туризмани гӀулакхех йолча Министерствон хьалха латтача Малсаганаькъан Адама. Из хоам «Сердалога» бир кагирхой цхьанкхетарий цӀагӀа.
«Къаман Ӏадаташцара балхаш дӀа ца доалийташ болча, лакха начӀал долча къахьегамхошта совгӀаташ делар министра. Тахан цу наха деш дола балхаш къаман вахаре чӀоагӀа лоархӀаме да», - дийцар тха газетага.
«Культура лораяр, ший къаман Ӏадаташ диццадар да. ГӀалгӀай къамо тхьовра денз хьаяхьа хозал, начӀал, Ӏадаташ тӀехьенгара тӀехьенга кхачийта гӀо деш дола нах да шо.
Оаха доаккхал ду шух, шун начӀал массайолча моттигашка дӀадовзийтара тӀехьа къахьегаргда оаха», - аьлар Малсаганаькъан Адама, доккха начӀал долча вай кхалнахаца къамаьл деш.
