«Къаман проекташ лоархӀаме дакъа дӀалоацаш я республикан вахаре. Къаман 13 проекта чуйоагӀа 45 моттигера проекташ йоаржаеш болх дӀабихьаб мехка», - белгалдир премьер-министра Сластенин Владимира. Иштта цо теркалдир, паччахьалкхен моттигаша шоай болх депутаташца бувзаме болаш дӀакхухьилга. Къаман проекташ йоаржае аьнна мехка къоастадаьр 4,7 млрд сом рузкъа да, кассови исполнени- 4,6 млрд сом (97,8%).

Тайп-тайпара гӀишлош хьалъеш, шахьарашкара моттигаш тоаеш, 80 кхетаче я вайцига дӀайихьараш. 25,8 эзар совгӀа сага моттигаш луш йола 41 ишкол хьалъяьй, 5,7 эзар совгӀа бера моттигаш луш йола 26 берий беш, иштта ялх дарбанче. Укх шера керда къаман проекташ йоаржаеш, 4,3 млрд сом рузкъа дӀалоацаш йола 28 моттиг чӀоагӀъяьй. Наьха вахара хьал, унахцӀено, экологи, иштта кхыдараш а тоадарах йолча йоккхача къаман проекташка дакъа лоацаш я республика.

2025-ча шера хила дезача лоархӀамеча хувцамех дувц Паччахьалкхенгарча каьхата тӀа. Уж ба 51 км латта 11 никъ, царна юкъера 21 км дӀалоацаш бола ийс никъ ер шу чакхдалалехь йистебоалаш ба, иштта 23 моттига куц хувцаш бола болх чакхбаккхар, Сурхо тӀара ветераний цӀа меттаоттадар, Шолжа-Шахьаре парк хьаеллар. Ялх ишколи, ши берий беши, ялх библиотекеи тоаеш болх ба дӀабахьа безаш, Ӏаьлий-Юрта хьалъе лерхӀ дарбанче, Чамалха - фельдшерско-акушерски пункт. Из деррига кхоачашдаро мехкарча наьха вахара хьал дикка аттачахьа, паргӀатонга доаккхаргда.