Хьалхарча дунен тӀема 110 шу дизара хетабаь гойтам
ГӀалгӀай къам мехкахдаккхара дагалоаттама Мемориала болхлоша «Сийлахь тӀом» яха гойтам кийчбир Хьалхара дунен тӀом хинна 110 шу дузаш хиларца дувзаденна. Гойтамо дувц российски исторен балан оагӀонех, Россе цӀихезача бӀухоех, цу юкъерча вай мехкахоех - Акха дивизи оалаш хиннача ГӀалгӀай бӀенах лаьца.
«Карарча шера 110 шу дуз Хьалхара дунен тӀом хинна… Сийлахь е ШоллагӀа Даьймехка тӀом оалар цох. Россе Хьалхарча дунен тӀем тӀа 1,7 млн саг велар, 5 млн гаргга нах лозабир, 2,5 млн де догацаш байна а, есарал баха а хилар. Салташа, эпсараша, Даьхе лораяра шоай декхар дика кхоачашдир, кӀезига йитанзар Хьалхарча дунен тӀем тӀа турпалхой оагӀонаш»,-аьлар «Сердало» газетага из гойтам вӀашагӀбеллараша.
Гойтам дӀабахьа лерхӀ ер бутт чакхбаллалца. Укхаза истори довза безам бараш бех, царна гургда дӀадахача шерашка хиннар кхы а кӀоаргагӀа.
