ГӏалгӀайче 36 лоархӀаме моттиг хьалъергья, иштта цӏенхаштта тоаергья
2026 шера Гӏалгӏайчен Ӏаьдал лаьрхӀа да хьалъе а, цӏенхаштта тоае а – 18 керда, 18 йолаш йолча вахаре лоархӀамеча гӏишлошта. Из хоам бир ГӏалгӀай Республикан Кулгалхочунга, гӀишлошъяра министра Иленаькъан Мусас, карарча шера гӀишлошъяра даькъ тӀа де лерхӀачох дувцаш.
«Из дукха болх ба, цу юкъедоагӀаш да дукха наьха вахарера керттера дакъа: дешар, унахцӀено, культура, спорт, вахар лорадар, инженерни даькъ тӀа эшараш»,- аьлар ГӏалгӀайчен кулгалхочо Келаматанаькъан Махьмуд-Ӏаьлас.
Керттера терко лоаттаергья ДОУ дешара моттигашта. Иштта хьалъе дӀайолаеш я керда ишколаш: 720 моттига лаьрхӀа Кердача Реданте, 420 Пхьилекъонгий-Юрта, 250 Гӏажарий-Юрта, 200 Галашка. Дӏахо хьалъергья ишкол-интернат Галашка, иштта кердайоахаргья йиъ берий беш, гимнази, колледжаш.
Культуран даькъ тӀа цӏенхаштта тоадергда культуран Цӏенош, къам мехкахдаккхара дагалоаттама комплекс. Карарча хана тоадеш латт Наьсарера культуран Цӏа, Къаман библиотека. Цул совгӀа, дӀайолаергья хьалъе МагӀалбике искусствай ишкол, иштта Магасе Республикански мехктохкама музей.
УнахцӀенон, вахара лорадара болх а ба дӀахьош. МагӀалбикерча психоневрологически интернате, ветераний ЦӀа тоадеча.
Тӏехьара тӀа тоадергда спортивни гӀишлон хьал - республике хьалъеш я Магаса къаман спорта оагӀув, иштта йиъ лаьрххӀа йола спортивни майдаш, ГӏалгӀай Республикан доал дара даькъ тӀа.
Эггара тахан эшаш йола бӀеха хиш дӀауха моттиг хьалъеш я Шолже, керда хий чулацара гӀишло - Эса хи тӀа, иштта цхьацца долча доал дара доакъой хий чулацара моттигаш тоаяр.
Из деррига лаьрхӀа да бахархошта керда хьалаш хьакхоллара. Кхоачашде таро хул къаман а, паччахьалкхен а программаш дӀахьош хиларах, федеральни центро хьаллоацаш хиларах.
«Баркал ала лов Президента Путин Владимира, Россе Паччахьалкхенна, цар иштта новкъостал дарах. Хӏара керда ишкола, лорий урхалле, культуран моттиг е кердадаьха бувзамаш – из духхьал гӀишло хинна Ӏац, из наьха вахара хьал тоадара, ГӏалгӀайче дегӀайоалаяра деш дар да», - аьлар Махьмуд-Ӏаьлас.
