Санаторенна-хьун ишколанна лаьрхӀа керда гӀишло хьалъе лерхӀ республике
16.08.2024 20:33
Чаненаькъан А.И. цӀерах йолча санаторенна-хьун ишколанна лаьрхӀа керда гӀишло хьалъе лаьрхӀад мехка. Галашка уллаш йола из дешара моттиг юрташкара хьал тоадара тӀехьа кхеллача программанна юкъе хургья.
«1930-ча шера хьалъяь гӀишло харцара кхерам болча хьале кхаьчай. Меттадахка, дарба де дезача берашта паргӀато луш, цу чура хьал тоадеш хургда, керда гӀишло хьалъяр. Тха санаторе-хьун ишколо аьттув лу дарба де санна, деша а, цудухьа чӀоагӀа лоархӀаме да керда гӀишло хьалъяр. Федеральни оагӀоно гӀо деш, вай берий хьал дикка аттачахьа даккха йиш хургья», - яздир ший телеграм-оагӀон тӀа Келаматанаькъан Махьмуд-Ӏаьлас.
2025-2026-ча шерашка аьттув баргба, Дала аьннадале, из беркате проект чакхъяккха.
