Балха моттигаш хьаечар проекташ кхоачашъе лерхӀ
![](http://serdalo.ru/storage/TgJFqlCeZARB9QyYwaHwVzBb96ObI6l1EKUFIHKS.webp)
ГӀалгӀайче лаьрхӀад «Обанхи» ООО, «Эрсий ярмаркаш» ООО яха проекташ кхоачашъе, яхаш, дийцар «Сердало» газетага ГӀалгӀай Республикан зарбан болх лелабераша.
«Со тешаш ва, из кхоачашдарца, мехка вахара-экономически хьал тоалургхиларах», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас.
ГӀалгӀайчен экономика дегӀайоалаяра Министерствонна, инвесторашта юкъе барт баь йола проекташ йоккхийчарех лоархӀаш я, цар мах 50 млн кӀезигӀа бац, цар таро лу балха моттигаш хьае.
Белгалду, «Обанхи» ООО - из цӀеначкъаьра лелабу ЖӀайрахьара боахам хилар. ТӀехьале йолаш хӀама да из, хӀана аьлча таханарча хана чкъаьрий леладар а кхедар а российски чкъаьрий леладара даькъ тӀа дика этта даьнна гӀулакх да.
ШоллагӀа проект - «Эрсий ярмаркаш» ООО. Яндаре бӀарччача шера болх беш хургйола, тайп-тайпара юртбоахама, промышленни ярмаркаш дӀаяхьара лаьрхӀа я из. ЧӀоагӀа лоархӀаме да, цо мехка 150 керда балха моттиг хьаеш хилар.