Бахархоша ЦУРе чутела дехараш кхоалагӏа дакъа лохденнад
Вай мехкадас Келаматанаькъан Махьмуд-ӏаьлас, ЦУРа балхах дувцаш, белгалдир; бахархоша деча дехарий тахан дикка терко елга; хьакимашта, наха юкъе бувзам болга. Дӏадахача шера ЦУРе 10290 сага дехараш техкар, хӏаьта 2024-ча шера – 15600. Дикка лохденнад нахагара уха дехараш. Паччахьалкхен моттигаша, хьакимаша мехкахошца бувзам лоаттабелга да из.
«Бахархошца массахана бувзам болаш, царна къувлараш, хало ераш фуд тохкаш хилча, тоалу цу оагӏонцара болх. Из гӏулакх дикка меттадоаладе гӏерташ къахьегаш ба тахан вайцига. Бахархошкара тӏалаттача дехарашка гӏолла, ше ма дарра бӏаргагу вайна моллагӏа хьал, цунга хьежжа ханнахьа кхоачамбоацараш юстардаха аьттув хул», - белгалдир вай мехкадас Келаматанаькъан Махьмуд-ӏаьлас.
Вахара оагӏонца дувзаденнарашцара болх а дикка тоабеннилга теркалдир Мехкадас. Унахцӏенон оагӏонца, дешарца, вахара оагӏонцара бокъонаш лораярца дувзаденна дехараш 40-57%-га кхоачаш лохденнад.
Боккха болх дӏахьу тахан ЦУРа хоамашца. 290 моттиг я дӏадахача шера тохкам баьр. Хица, газаца, наькъашкарча хьалаца дувзаденна хоамаш ханнахьа доаржадеш болх лоаттабир цига.
Иштта ӏаьдала моттигашка ӏомавеш йола семинараш дӏакхахьаро а дикка тоадир цу оагӏонца дувзаденнараш. Вай Мехкадас доккха баркал кхайкадир ЦУРа кулгалхошта, ерригача тоабанна, ший декхараш биззача боараме кхоачашдеш, мехкара хьал аттачахьа доаккхаш къахьегарах, бахархошца лерхӏам хиларах.
