Терроризмо вахар хоададаьраш дагалаьцар
«Терроризм йоаца дуне» яха, цу доккхача зулама духьала къовсам лоаттабеча Денна хетаяь кхетаче дӀайихьар Дола-Коарча культуран цӀагӀа. Кхетачен керттера декхар - терроризм яхача бӀехача зуламо мел дукхача наьха вахар хоададаьд, толхадаьд дӀахьокхар, иштта хӀара саг цу хӀаман духьала къовсам лоаттабе декхарийла волга хьалхадаккхар.
«Кхетаче дӀахьош хиннача Бохтаранаькъан Иманас, дикка доаржадеш, дийцар цу доккхача зуламах. Тахан мехкарча Ӏаьдало бахархой цу вонах лорабеш дӀахьу болх белгалбир цо. Къаьстта йоккха терко тӀайохийташ дийцар терроризма юкъе вахар хаьдача, цхьаккха бехк боацача нахах», - хоам бу «Сердалога» культуран цӀенна кулгал деча Алерой Билала.
Кхетаче гулбеннараша дагалаьцар Берса-Юрта, «Норд-Осте», Россе аэропорташка, метрошка цу доккхача зулама юкъе байнараш. Къахетам яха хӀама дег чу доацача бӀехача адамаша доаржадаь уж зуламаш мехка цӀаккха а дицлургдац.
Кхетаче гулбеннарашта хьалхадаьккхар, нах гулбеннача моттигашка лоравалар мишта хила деза, моллагӀа тешаме доаца хӀама зийча фу де деза.
Культуран цӀен бераша из мел унзара, хала хӀама да хайташ байташ йийшар. ХӀара сага кхетаде дезаш да, адамашта цхьаккха зулам де йиш йоацилга; юкъе бӀеха, во хӀама доаржаде гӀертарашта доаггӀаш дола таӀазар дӀадала дезилга.
