СВО вахар хаьдача доакъашхочун цIен- наьнага, итт берага хьожаш ба мехка
Украинерча тIема операцена юкъе вахар хаьдача ГIаьнтамарнаькъан Темарлана цIен-наьнага, цун итт берага хьожаш, терко лоаттаю «Даьхен лорабой» яхача ганза болхлоша. Из хоам «Сердалога» бир цу моттигера.
«БIухочун цIагIарча нахаца кхетаче дIайихьар психологаш болча Местой Хьавас, Меданаькъан Миланас. ЦIен-да дIаваьнна йисача Овшанаькъан ПаьтIамата тIалаттар доккха дукъ да. Тахан ший вахаре латташ долча кхоачамбоацарех, шийна къувлаш долча хIамаех дийцар дог дехача кхалсага. Эшаш долча хIаманга хьожаш, терко лоаттаергья аьнна къамаьл дир цунца ганза болхло волча Темирханаькъан Iийсас», - йоах тхога бенача хоамо. Тахан шийна тIалаттар йоккха хало яле а, йоха ца йохаш, ший дезала доал деш дIахо вахар тоаде лаьрхIа я ПаьтIамат.
«Иштта уж болча дIаваха къамаьл деш, ха йоаккхаш хилча; к1еззига байлу аьнна хет цу нахагара бала. Царна терко яр, дог хьастар чIоагIа лоархIаме да тахан» ,- дийцар психолог йолча Меданаькъан Миланас.
