«ТолашагӀа бола доалахьара боахам», «Зизай фестиваль» яхача яхьашка котбаьннараш хьакхайкабир
«ТолашагӀа бола доалахьара боахам», «Зизай фестиваль» яхача яхьашка котбаьннарий цӀераш яьхар мехка. Из хоам «Сердалога» бир Минсельхозе. «ТолашагӀа бола доалахьара боахам» яхача яхьашка (совгӀата ганз - 3 млн сом) дехар чуденнараш 783 боахам бар, хӀаьта «Зизай фестиваль» яхача яхьашка (совгӀата ганз - 1 млн сом) дехар чуденнараш - 173 саг. Шин оагӀонца яхьаш дӀайихьа, толашагӀбараш хьахержар.
«ТолашагӀа бола доалахьара боахам» яхача яхьашка хьалхара моттиг яьккхар Хьуле яхача Иленаькъан Фатимас. Цунна кхаьчар 500 эзар сом ахча. ШоллагӀа моттиг йийкъар Илдарха-ГӀалий тӀарча Овшанаькъан Баьтар-Султана, ТӀой-Юртарча Овшанаькъан ПаьтӀамата. 300 эзар сом эцаргда царех хӀаране.
КхоалагӀа моттиг йийкъар Ӏаьлий-Юртарча Цхьурой Фатимайна, Алхастерча ЦӀечой Рафидайна юкъе. 200 эзар сом лургда царна. Кхы а ткъаь сага лургда 100, 50 эзар сом ахча.
«Зизай фестивале» хьалхара моттиги 300 эзар сом ахчеи Буро кӀалхарча Тутайнаькъан Джульеттас даьккхар, шоллагӀа моттиги 200 эзар соми ГӀазе-Коарча КӀориганаькъан Азаси, кхоалагӀа моттиги 150 эзар сом ахчеи Илдарха-ГӀалий тӀарча Лаьнанаькъан Азаси даьккхар. Кхы а ворхӀ сага 50 эзар сом ахча лургда.
«Гурахьа юртбоахама моттигашка къахьегарий Ди дездеча хана, «Дошо гуйре» яхача кхетаче белгалбергба котбаьннараш», - дийцар тха газетага.
