Минавтодора балхах дийцар мехка
Ер шу долалуча хана, эргалонех чакхъяьлар вай мехкара Минавтодор. Республикерча машина наькъашца дувзаденнараш хӀанз царна тӀалатташ да. Мехкадаь, Паччахьалкхен зарбан болх лелабераша белгалдечох, цу гӀулакхах хьахинна пайда гуш ба.
Укх тӀехьарча бетташка болхлой мугӀараш тоадеш, машинашта доал дергдола керда болхлой хьаэцаш, болх дӀабихьаб. ХӀаьта эггара керттердар да, ГАУ «Ингуштранспорт» яхача моттиге къахьегарашта маьтсела, кӀимарса, аьтинга бетта доагӀаш дола алапи дӀадалар.
Цул совгӀа, йиъ автобус тоаяьй, моторашкара даьтта хийцад, оатхалашта лаьрхӀа моттиг Ӏалашъяьй. Шолжа-Шахьар-БуротӀе, Хасавюрт яха автобусаш йолаеннай. Иштта меттаоттае лерхӀ Наьсаре-Ставрополь, МагӀалбик-Нальчик, МагӀалбик- Горячеводск яха рейсаш.
Хувцамаш да фецарча кемай наькъашка а. Казань-Магас яха рейс йолалургья ардара бетта 7-ча дийнахьа. Иштта Самарски областерча губернаторга хоам баьб; Самара-Магас яхача рейса гӀо де, аьнна.
Вай мехкадас Келаматанаькъан Махьмуд-Ӏаьлас белгалдир, цу оагӀонцара болх вай мехка дуккхача шерашка чӀоагӀа во, телха лаьттилга. Массехк кхоачамбоацар дар цу юкъе.
«Карарча хана болх боаггӀача боараме хьаоттабе хьожаш, къахьегаш латт. Аьттув баьннараш да, бакъда кхы а дикка къахьега деза дӀахо. Вай декхар - мехка бахача наха дӀа-хьа ахара гӀулакх лертӀача даккхар, хила беззача тайпара из болх меттабоалабеш, наха паргӀато Ӏалашъяр.
