Хин гӀулакх тоадеш латт мехка
Мехкара хин гӀулакх тоадеш, къахьегаш ба даггара. Из хоам «Сердалога» бир Мехкадаь зарбан болх лелабераша.
«Илдарха-ГӀалий тӀарча Мехкдаьттан, ДжабагӀанаькъан, Тиймарзанаькъан оалача урамашкара хин турбаш хувцаш баьхкар укх деношка. ГӀажарий-Юртарча Мира оалача урам тӀара нанос хийцай, цу тайпара болх дӀабихьаб Эбарга-Юрта, ГӀаьзе-Коа.
Тишъеннача насосашта меттел, дикагӀъяраш увттаяьй цига. Наьсарера, МагӀалбикера бӀеха хиш дӀауха моттигаш цӀенъяьй, хин турбаш тоаеш болх дӀабихьаб», - белгалдир вай Мехкадас Келаматанаькъан Махьмуд-Ӏаьлас, цу оагӀонцарча балхах дувцаш. Цул совгӀа, хий доацача моттигашка машинашца хий дӀатӀакхухьаш къахьег республике.
Аьльтий-Юрта керда водозаборни станци хьаелла лерхӀ, дукха ца говш. Цу гӀулакхо дикка аттача доаккхаргда Наьсарера, Наьсарен кхалерча моттигашкара хин хьал.
