Полици, ОМСа викалаш, юкъарло лоархӀаме дешаш кхоачашдеш я
ГӏалгӀайчен даькъ тӀа каст-каста дӀакхухь бокъонаш лораераша, моттигерча Ӏаьдало, бахархоша цхьана ю наьха вахар тоадара тӀаерзаяь кхетаченаш. Цу тайпара, укх деношка МагӀалбике герга истол дӀадихьар, яхаш, дийцар «Сердало» газетага республикан МВД.
«Цу тайпара кхетаченаш дӀахьош хиларо ГӏалгӀай Республике гӀолла йолча МВД, иштта шахьара, юрта бахархошта юкъера бувзам дикагӀа лелабе таронаш хулийт. Шоайла дӀа-юха дувца йиш йолаш хул бокъонаш лораераш, юкъарло моллагӀа дола вахарера хьал. Из чӀоагӀа эшаш а да республикан МВД дувзаденна дола дешаш кхоачашдара», - хоам бу цигара.
Из кхетаче дӀаяхьара хьал вӀашагӀделлар яр ГӏалгӀай Республике гӀолла йолча МВД чуйоагӀаш йола юкъарлон совет, иштта моттигерча Министерствон кулгалхой.
ГӏалгӀай Республике гӀолла йолча МВД юкъарлон совета кулгалхочо Гаданаькъан Мусас белгалдир, укхаза «наха дукхагӀа дагадоахкаш дола лоархӀаме хаттараш дувцаш хилар, цу юкъе кагирхошца, наркоманеца дувзаденна хьал юхатохара полице дӀахьош бола болх а, кхыйола кхетаченаш а йолаш, къаьстта кагирхоша ПДД бокъонаш телхаеш доккхий зуламаш деш хилар а чудоагӀа цига».
Из гуллам дӀахьош, цига дакъа лоацаш хиннача бахархоша белгалдир, шахьаре наркотикаш, корта бохабу малар тӀехьарча хана дукхагӀа юкъедоалаш хилар.
Цу тайпарча хоамо декхарийла оттабу паччахьалкхен тайп-тайпара болхлой, юкъарло эггара халагӀа латта из декхар цхьана кхоачашдара, цига цхьоагӀо хилийтара.
