Тӏема шерашка Ленинграде лаьттар дагадоагӏа вай мехка
Россе тӏема сийлен Ди , Ленинградера фашист вохаваь араваьккха ди дездеш ба вай мохк тахан, наджгоанцхой бетта 27-ча дийнахьа. Вай мехкадас Келаматанаькъан Махьмуд-ӏаьлас белгалдир, республикера бахархой Нева хи тӏа уллача шахьара истори дика довзаш, тӏема шерашка цига лаьттар дег чу долаш болга.
«872 ди даьккхад Ленинградерча наха даггара чудетташ герз долаш, йӏовхал йоацаш, моцало кӏалбита. Бакъда Ленинград турпал хинна духьаллаьттай цу халонашта! Тамашийна турпалал гойташ лаьттаб кхалнах, боккхий нах, бераш. Цӏеча эскара бӏухоша, цига бахаш хиннача наха фашист вохаве гӏерташ леладаьр тӏема исторена дика довзаш да.
Цу хӏамо хьагойт, Даьхе езаш хилар, цхьан мехка нах берригаш цхьана духьалъоттар мел доккха да!» - белгалдир Келаматанаькъан Махьмуд-ӏаьлас, ший къамаьла юкъе. Ла ма могга хала хиннача ханашка боха ца бохаш, лира тохаш фашиста духьала лаьттарашта, Коталон ди гаргадоаладеш шоай синош цакходаьрашта баркал кхайкадир Мехкадас.
«Уж денош диццадар вай декхар да! Тӏехьа тӏабоагӏача къонабарашта довза деза из истори. Моастагӏа вай лаьтташкара аравоаккхаш лаьттарий цӏераш исторена даиман йовза езаш я. Ленинград мукъаяьккхараша гойта турпалал дийца варгвоацаш да», - белгалдир вай Мехкадас.
