ГӏалгӀай мехка безбир, эллиной-румий латарах Россе котбаьннараш
ГӏалгӀай Республикан физически культуран, спорта министра Белхарой Руслана безбир, эллиной-румий латарах дӀахьош хиннача Россе Хьалхалене 24 шу даьннарашта юкъе хьалхара моттигаш яьхараш, хоам бу «Сердало» газетага ГӏалгӀайчен спортивни латара Федераце.
Дег чура баркал оалаш, ахчан совгӀаташ делар дошо майдилгаш яьхача Бӏарахой ИсмаӀала, Ӏарпенаькъан Рамзана, дото мейдилг яьккхача Мазенаькъан Турпал-Ӏаланна, борза майдилг яьккхача Бӏарахой Мухьмада.
Иштта министра терко йир воккхагӀа волча тренера Ӏарпенаькъан Ислама, ГӏалгӀайчен гулъяьча тоабан кулгалхочунна Чаненаькъан Мустафай, «Ади Ахьмад» клуба воккхагӀа волча тренера Даниелян Григоре, «Ади Ахьмад» клуба тренера Хамхой Ислама. Цо яхачох, хьехамчаша цу берашта дукха шоай низ дӀабеннаб, цудухьа тахан цар вай гӀаддуг.
«Шун толамаш даха таро хилар, оаш а шун тренераша а дика къахьегарах, иштта «Ади Ахьмад» спортивни клуба кулгалхоша, шоашта керте Харсенаькъан Ӏалихан а волаш, дика терко лоаттаярах.
Тахан Россе ондаргий Хьалхален чаккхенах майрра ала йиш я, «Ади-Ахьмад дикагӀа йолча клубах цаӀ я, хӀана аьлча цхьан спортклубе йиъ майдилг яккхаро хьагойт цун боарам», - аьлар Белхарой Руслана.
