Республикерча ишколай хьал тоадеш латт
04.06.2024 10:07
Ишколашкара хьал тоадара тӀехьа дӀахьош, боккха болх ба вай мехка 2022-ча шера денз. Из хоам «Сердалога» бир Мехкадаь зарбан болх лелабераша.
«Тишъенна ишколаш тоаеш латт, дукха рузкъа дӀатӀадохийташ. Укх тӀехьарча шерашка 29 ишкол тоаеш боккха болх дӀабихьаб вай, укх шера тоае езарех кхы а ялх ишкол я», - белгалдир вай Мехкадас Келаматанаькъан Махьмуд-Ӏаьлас.
ЛаьрххӀа оттаяьча комиссе тохкам бу, малагӀча боараме дӀабихьаб из болх. ЦӀерцара хатар, иштта кхыдола дагадоаца хатараш хилча, царна духьалара кийчо мишта яьй хьож комисси.
Вай Мехкадас белгалдир, кхерамзлен хьал боаггӀача боараме дола, хоза тоаяь латта цӀена, паргӀата ишколаш - вай кхоане йолга.
