200 моттиг йола психоневрологически интернат хьалъергья республике
200 моттиг луш йола психоневрологически интернат хургья МагIалбике кастта. Мехка лоархIаме йола из проект РФ къахьегама гIулакхех йолча Министерствоc хьаллоацаш я. Укх шера бIаьсти дIаболабир цу оагIонцара болх. Оттаяьча ханага хьежжа, дIахьош ба болх карарча хана.
«ДегIа могашал эшаеннарашта эшаш мел дар долаш, таханарча хано дIадеххача тайпара тоаяь моттиг хургья из. Араваьнна волавала моттиг, лувча, хIамаш йитта, хIама даа моттигаш хургья цига.
Иштта йола моттиг цахиларах, тахан дукха унахой лорашкара цхьаккха дарба доацаш цIагIа Iеш ба. ХIаьта 1940-ча шера Дола-Коа хьалъяь иштта йола интернат тишъенна, къаенна дукха ха я. Цул согIва, тахан йиза а латт из, 50 сага меттел 70 саг волаш.
Вай мехка дукха ба цу оагIонцара гIо эшаш, из дIа ца кхоачаш бола нах», - язду ший телеграм оагIон тIа вай мехкадас Келаматанаькъан Махьмуд-Iаьлас. 2027-гIа шу йийстедоалаш, кийча хила езаш я из интернат.
Доккха гIо хургда цох вай мехка, деррига балхаш чакхдаьлча. ДегIа могашал яйначарна чIоагIа новкъостал да из, цунга хьежжа лоархIамеча балхех я из проект.
