Юххьанцарча унахцӏенон оагӏонца дувзаденнараш тоадара тӏехьа къахьег вай мехка
Унахцӏенон оагӏонца дувзаденнараш меттадоаладара тӏехьа, къахьегаш ба тахан мехка. Из хоам «Сердалога» бир Мехкадаь зарбан болх лелабераша. «Цу оагӏонцара болх тахан лакхача боараме дӏабахьа безарех ба. РФ Паччахьалкхено 2026-ча шера наджгоанцхой бетта 19-ча дийнахьа № 12 йолаш оттаяьча чӏоагӏонга хьежжа, дукха нах бахача юрташка унахцӏенон оагӏонца дувзаденна кердадараш юкъедоаладеш ба тахан», - белгалдир вай мехкадас Келаматанаькъан Махьмуд-Ӏаьлас.
Цу боккхача балха юкъе да дарбанчеш, амбулатореш тоаяр, царна эшаш йола хӏамаш хилийтар, модульни фельдшерско-акушерски пункташ хьалъяр, онкологически, пхаьний лазарашцара болх, гӏо дар дикка доаржадар. Юрташка, шахьарашка баха нах паргӏатта лорашка чакхбала йиш йолаш хила беза.
«Россе Президента хьаллоацаш хиларца, Жӏайрахьа кхале ядача Даьттагӏе, Оалкама ши ФАП хьалъе лерхӏ. Цига геттара чӏоагӏа эшаш я уж тахан. Цул совгӏа, дарбанчешка эшаш 39 тайп-тайпара гӏирсаш да хьачудахьаргдолаш, цу юкъе хургья Шолжа кхален керттерча дарбанчен лаьрхӏа магнитно-резонансни томографе аппарат», - белгалдир Мехкадас.
2026-ча шергара 2030-ча шерга кхаччалца, дӏабахьа безача цу балхо дуккхадараш тоадергда вай дарбанчешка.
