30 шу дизарца даькъалабийцар, анзорий оагӀон болхлой
Анзорашта хетаяь кхетаче дӀайихьар вай мехка. 30 шу хьалха хьакхеллар вай республике Россе ФСБ ГӀалгӀай мехкара анзорий оагӀув. Цу гӀулакха хетаяьча кхетаче дакъа лоацаш вар республикерча паччахьалкхенна хьалхалатта Сластенин Владимир.
«Даьхен доазув лорадеш латтача наьха декхараш аттачарех дац. Шоай болх боаггӀача боараме дӀахьош; денал, яхь гойташ; хьадоагӀа шо укх дуккхача шерашка. Мехка кхерамзле эггара лоархӀамеча моттиге лоаттаеча, атта йоацача хана дах вай. Шо санна Даьхен гӀулакха латтача нахаца моллагӀа халонаш эшалургья, аьнна, хет. Иразе, могаш долаш, дахалда шо! Оашош дӀахьоча лоархӀамеча балха тӀа аьттув хилба шун!» - аьлар цо анзорий мугӀарашка латтараш даькъалбувцаш. Кхетаче йолаш дагалаьцар, Даьхен гӀулакха вахар дӀаденна болхлой. Вай дегашта цӀаккха а йицъяла йиш яц цар цӀераш!
