Чаненаькъан Тамарай керда книжка довзийтар
ГӏалгӀайчен культуран вахаре сийрда моттиг нийсъелар - кепа теха арадаьлар начӀал долча гӀалгӀай поэтессай Чаненаькъан Тамарай сборник. «Ничья» яха Чаненаькъан Тамарай книжка безам тӀагӀоргболча тайпара яздаь да, автора хоза байташ эллиной меттала шоайла лоалаха я, таржам даь. Цига новкъостал даьр ва российски политик, дипломат, Российски Федераце Кипрера посол Зязганаькъан Мурад.
«Из мах болаш хилар гуш да исбахьален оагӀонга диллача а. Сборник арахийцад совгӀата кеп йолаш, цо из литературни даь а ца Ӏеш, тӀера а мах болаш ду. Эллиной меттала таржам даь хиларо керда наькъаш хьадийллар гӀалгӀай поэтесса кхоллам безарашта. Автора книжка делар библиотека кулгалхочун Гӏазданаькъан Радимайна, ший кулг тӀа а долаш. Цо хьагойт Чаненаькъан Тамарайна, ший хьамсарча мехка культуран вахар дегӀадар мел эшаш да», - аьлар «Сердало» газетага ГӏалгӀайчен Янданаькъан Жамалда цӀерагӀча Къаман библиотеке.
Чаненаькъан Тамарай книжка дешахьалхе язъяьр ва дика вовзаш вола литературовед Ноакастхой Хаваж. Чаненаькъан Тамарай кхоллам дика бовзаш волча цо, хоадам боллаш мах оттабу цун поэтически тӀехьаленна, хьаеллаш еррига исбахьален поэтессай говзал.
Суртанчан оагӀорахьара из кийчдаьр я начӀал дола Ӏумаранаькъан Аьсет. Цун сурташа белгалъю байташа ювцаш йола оагӀонаш, ший тайпара безам тӀабода хьал хьакхолл.
«Ничья» яха книжка арадаларах доккха ди хилар автора кхоллама биографе. Цо хьагойт поэта стиль, хьаелл керда начӀала оагӀонаш. Цох доккха совгӀат хургда автора кхоллам безаш мел барашта.
