«Рамадан - дикача гӀулакхий бутт»
Иштта цӀи йолаш ба вайцига дӀахьош бола болам. ХӀара шера дӀакхухьаш долча Рамадана хетадаьча боламашта юкъе дакъа лаца ловраш дукха ба вай мехка. Укх наькъа а шоашкара Даьла раьза хургвар гойта лаьрхӀар ВДДМ «Хьалхарчар болама» моттигерча штаба чуйоагӀача тоабо. Из хоам «Сердалога» бера цу гӀулакха хьалхалаттарашкара.
«Халача хьале болча, таро йоацача наха лаьрхӀа кхачах дизза тӀормигаш кийчдир цу оагӀон болхлоша. Цул совгӀа, новкъа болхача наха марха даста хийи хурмаши екъаш лаьттар уж», - йоах тхогарча хоамо. Мархий бутт йистебаллалца дӀахьоргболаш ба вай мехка цу тайпара болх.
«Дикача лерхӀамех, гӀулакхех бизза хилба вайна ер Рамадан бутт. Вай массахана кийча хургда эшачоа гӀо де. АллахӀа къоабалдолда вай марха, Ӏибадат!» - аьлар Налганаькъан Рамзана.
