Терроризма духьалара кхетаченаш я мехка дӀакхухьаш
Терроризм яхача зулама духьалара болх тоабеш кхетачеш я Наьсарен кхале дӀакхухьаш. Из хоам «Сердалога» бир Миннацо.
«Тахан эггара лоархӀамедар - цу зулама духьалара болх боаггӀача боараме дӀакхахьар. Массане цхьана тоабе безаш ба из болх. Наьсарен кхален АТК Секретарь волча Хьоашаланаькъан Ӏаьлас бахархошца шоаш дӀабихьача цу оагӀонцарча балхах дийцар. Къаьстта къонача тӀехьен кхетам нийсбеш, кхоачашде дезараш теркалдир цо. Кхален дешара оагӀон моттига кулгалхочо дешархошца шоаш дӀабихьача балхах дийцар. Цхьан шера 375 кхетаче дӀайихьай цар кхувш латтараша лораде дезараш хьалхадоахаш», - белгалдир мехкарча Миннаца кулгал деча Мизенаькъан Руслана, цу оагӀонца кхоачашде дезарех дувцаш.
Цул совгӀа, цо белгалдир, тешаме ца хетача оагӀонцарча кагирхошца къаьстта боккха болх дӀакхахьа безилга. Кхувш латтараша цу хӀаманна духьала къовсам лоаттабергболаш, дика хургда аьнна мел хетар юкъелаца деза. Иштта теркалъе еза, моллагӀа хӀама хоаделча телефон дӀатоха еза номераш, оарц деха деза, хоам бе беза моттигаш кхувш латтарашта йовзаргйолаш къахьега деза.
Деша ухаш долча хӀара бера моллагӀа кхерам хоабелча ший фу де деза ховргдолаш, цу моттигашка из деррига хьалхадоаккхаш йола стендаш йоахкий хьажа, аьнна, тӀадиллар министра.
Къона тӀехье цу доккхача, унзарча вонах лораеш, цун сакхетам лакхбеш, цу оагӀонца дувзаденнараш довзийташ, мехка дӀахьош лоархӀаме болх ба из тахан.
