ДӀахо цӀенхаштта тоабеш латт, Наьсаре-Терек-Долакха-Юрт оала никъ
Республикан автодора Министерствос цӀенхаштта тоабеш ба Наьсаре-Терек-Долакха-Юрт яха никъ, из бӀаьха ба 9,5 км. Цхьан оагӀорахьа наькъо вӀашагӀхотт Долакха-Юрт, Тӏой-Юрт МагӀалбика кхаленца, вокх оагӀорахьа - Наьсарен-Шахьарца.
Уж балхаш хьадеш да кӀезиг-кӀезига, никъ дӀа а ца къовлаш. Наькъа йисте гӀолла, Тӏой-Юрта да дукха ха йоацаш хьалдаь культуран Цӏа, №4 йола юкъера ишкол, ФАП, иштта берий беш, из хӀанз хьаелла лерхӀаш я.
Цунца цхьана наькъа болхлой лаьрхӀа ба наькъ тӀа вӀаштта ши тӀоа асфальт билла, хий чакхдувлаш йола турбаш Ӏояхка, гӀашлой никъ бе, новкъа гӀармаш оттае.
«Иштта проектах керда сердало чуйилла лаьрхӀад», - аьлар наькъа боахаме.
Белгалду, из никъ цӀенхаштта тоабара болх дӀахьош ба «ГӏалгӀай республикан автомобильни наькъаш дегӀадоаладар» яхача программах. Цул совгӀа, карарча шера цу программа чуйоагӀаш йиъ наькъий моттигаш тоае лаьрхӀад, царех да МагӀалбика кхален Юкъерча Ачалкхера Ачалкх яхача хи тӀа тилла тӀий.
