«Дешархошта лаьрхӀа культура» яха проект я мехка кхоачашъеш
Россе къамий культураца дувзаденнараш довзийташ я къонача тӀехьена берригача мехка дӀахьош йола «Дешархошта лаьрхӀа культура» яха проект. Кердача Реданте дӀайихьар «ГӀалгӀай къаман даар» яха кхетаче-гойтам.
«ГӀалгӀай даар дукха хӀама чулаьца а, дерригача дунен даарашта юкъе белгала а да. БӀаьшерашка денз, вай къаман истори, Ӏадаташ довзийташ хьадоагӀа из. Вай даарашта юкъе керттера моттиг дӀалоацаш ба устагӀан, бежана, коа тӀарча оалхазарий дулхах кийчбаь кхача. Иштта лоархӀаме моттиг дӀалоацаш да цу оагӀонца шурийцара даараш, ябакх, хьажкӀа, хьонк. Кондар техе кийчдеш хиннад уж даараш вай ноаноша, тхьоврча хана денз. ХӀаьта истола тӀа эггара лоархӀаме моттиг дӀалоацараш массахана дулх-хьалтӀам, цунца буаш бола берхӀа хиннаб.
Иштта, тхьоврча хана денз, каст-каста вай цӀагӀа кийчдеча даарех я кхеш, дулхи коартоли вӀашагӀтеха даар. Хьоарах яь хӀама массанена езаш хиннай вай къаман юкъе. КӀаьда, хоза даь чӀаьпилг, дика етта сискал юаргйоацаш саг хургвац тахан вайна юкъе», - дийцар «Сердалога» культуран цӀен болхло йолча Хоаной Марета. ГӀалгӀай къамо тхьовра денз лоархӀаш хьадахьа даараш, массахана наха чаме хетараш малагӀаш да довзийтар цу кхетаче. Ӏадатий, чамий гойтам хилар цох.
«Дешархошта лаьрхӀа культура» яхар тахан лоархӀаме проект я, цунга гӀолла къамий вахаре лоархӀаме дола хӀамаш малагӀаш да белгалде, уж лораде аьттув хургба кхувш латтарий.
