Наркоманена духьалара къовсам чӀоагӀбу республике
Наркоманена духьала къовсам лоаттабеш бола болх дӀахьош ба МагӀалбика кхале. Инаркъерча № 12 йолча ишкола дешархошца, цу зуламах дувцаш йола кхетаче дӀайихьар.
Берашцарча вӀашагӀкхетаре дакъа лоацаш вар МагӀалбика кхалерча наркоманеца къовсам лоаттабеча комиссен секретарь вола Хамхой Ӏалихан, 18 шерга кхачанза долча берий гӀулакхех йола болхло Доданаькъан Марем.
«Хамхой Ӏалихана дешархошка дийцар, наркомани яхача доккхача зуламо сага вахара деча зенах, цунца бувзам лелабераша шоай ираз доадеш хиларах», - дийцар «Сердалога» шахьара администраце. Наркотикашца бувзам лоаттабеш бола вай мехкара бахархой 20 е 35 шу даьнна ба дукхагӀча даькъе. Вай дерригаш оарцагӀдаьнна, юхатоха дезаш доккха зулам да из! Цу бӀехача гӀулакха никъ хоадабар - вайх хӀаране декхар!
