«Россе довзаш доаца наькъаш» яхача проектах, кино доаккх вайцига
«Культура» яхача телеканала «Россе довзаш доаца наькъаш» яха проект дӀахохьу, ГӀалгӀайченах дола фильм доаккхаш. Хьажархошта кердача тайпара гургья Россера моттиг, таханарча ден а иштта дӀаяхача ханара а лоархӀаме моттигаш юкъе йолаш. Кердача гойтама юкъе дакъа лоацаш хургба дика бовзаш бола нах, гуш хургья мехка Ӏалама хозал.
Кино доаккхаш юкъейоалаяьй дӀадахача бӀаьшерашка нах баьха моттигаш, кхерах яь гӀалаш, республикан лоаман даькъ тӀа тахан а йолаш йола хозаленаш, тайп-тайпара исторически гӀишлош, таханарча ханара промышленни гӀирсаш, керда къаман карагӀдоалараш, кулгаговзал, къаман даар, иштта кхы дуккхадараш. Хьажархошта иштта гургба къаман халхара говзанч-хьехам, гӀалгӀай къаман этнокультуран тӀехьале.
«Россе довзаш доаца наькъаш» яхача программан тоаба яха хилар Россе халкъа суртанча, хӀамаш кхоллара Российски академе сийдола доакъашхо Поаланкой Мурат волча; иштта из яхар чкъаьран цӀоках гӀирсаш деш йолча «SHADӀ» яхача фабрике, дӀахо цӀихезача тохкамхочунца Дзейтанаькъан Бесланаца цхьана яха хилар Тийрка дукъ тӀа, МагӀалбик лораеш лаьттача тӀема керттера моттиг йолча.
