Гӏалгӏайче дӏахьоргья «Халкъашца доттагӏал долаш» яха къаман культуран фестиваль
Халкъа цхьоагӏон ди гаргадоагӏаш, Гӏалгӏайче дӏахьоргья йоккха «Халкъашца доттагӏал долаш» яха къаман культуран фестиваль, цох бокъонца дола тайп-тайпарча къамий ӏадатий цӏай хургда. Фестивала керттера бахьан – Гӏалгӏай мехка дахача къамий культуран тӏехьален мах бараш лорадар, доаржадар. Цига тайп-тайпарча къамий культураш гойтаргья, цар шоайла къамаьл хургда культуран даькъ тӏа, кхоллама майда хьаелларгья, дӏахо цхьана из балха дакъа дӏахьоргдолаш.
«Начӏал долча кхоллама тоабаша гойтаргда, цига дакъа лоацаш хургболча наха, шоашта фу карагӏдоал. Халкъа кхоллам хьаллацара даькъ тӏа, культуран цӏай хургда из. Къаьстта терко тӏайохийтаргья къаман ӏадаташ лорадеш болча, начӏал долча иллиалархошта. Кхоллама даькъ тӏа шоайла къамаьл хилар, балха говзал дӏа-юха эцар хургда цига керттера терко тӏайохийташ дар. Доакъашхой таро хургья шоай балха говзал гойтарал совгӏа, кхы а къамий культурай говзал а юкъеяккха», - аьлар «Сердало» газетага кхетачен болх вӏашагӏбеллараша.
Таханарча заман вахаре лоархӏаме да къаман ӏадаташ лорадар, уж дегӏадоаладар. Фестивале къаьгга гуш хургда мехка юкъарча вахара оагӏонаш мишта дегӏайоагӏаш я, Гӏалгӏайчен къамий цхьоагӏо хилар. Цун сийдола хьаьша хургья Гӏалгӏайчен халкъа артистка Охценаькъан Роза.
