«Коталон диктант» яха болам дӀахьоргба мехка
Укх бетта 25-ча дийнахьа ерригача Россе, иштта кхыдолча мехкашка «ЦаӀ йола Росси» яхача оагӀоно юкъебаьккха «Коталон диктант» яха болам дӀахьоргба. Вай республико а хьаллоацаргда из гӀулакх. «Сердалога» из хоам бир Мехкадаь зарбан болх лелабераша. Диктанта кийчо еш ба даггара: 3,5 эзар совгӀа болча бахархоша Сийлахь-боккхача Даьймехка тӀема истори шоашта малагӀча боараме хов тохкаргда 70 доазон тӀа.
«Фашист вохавеш вай Котало яьккха 80 шу дузаш, тӀема исторецара бакъдар кердадаккхар, дӀачӀоагӀдар лоархӀаме гӀулакх да», - аьлар вай Мехкадас Келаматанаькъан Махьмуд-Ӏаьлас. Партена хьалха латтача Медведев Дмитре чӀоагӀо яь, хаттарашта юкъе да тӀема операцеца дувзаденнараш, иштта Даьхенцара гӀулакх гойтараш.
«Коталон диктант» - ший кхетам тахкар хинна Ӏац, тӀема истори лархӀар да из эггара хьалха», - аьлар мехка Кулгалхочо. Дакъа лаца йиш йолаш ва моллагӀа вахархо. 70 юкъерча моллагӀча доазон тӀа, е коталондиктант.рф керттерча сайтага гӀолла онлайн дакъа лаца йиш я наьха.
