ГӀалгӀайчен прокуратуро алапи хьацадаларах дола гӀулакх суде дӀадахьийтар
Наьсарен-Шахьара прокуратуро техкар, транспорта предприяте кулгалхочун декхараш кхоачашдеш волчун духьалара уголовни гӀулакх. ГӀулакхера саг бехке ву зулам даь хиларах, РФ УК 2 даькъа 145.1 статьях, доагӀаш дола алапи дӀацадаларах болхлошта шин бетта совгӀа йолча хана, кулгалхочун иштта ловш хиларах.
«Из уголовни гӀулакх хьадийллар прокурора предприяте къахьегамхой бокъонаш толхаяь хилара тӀахьожама балхага гӀолла. Тохкамхоша гучадаьккхар, 2024 шера лайчилла беттагара 2025 шера саькура беттага кхаччалца, предприяте кулгалхоша алапи дӀаденна цахилар. Цхьаккха законах доагӀаш бахьан а доацаш 1,5 миллион сом ахча дӀа ца луш битар болхлой. Иштта дале а, организаце долаш дар царна дӀадала ахча», - аьлар «Сердало» газетага ГӀалгӀайчен прокуратуре.
Долаш дола ахча кулгалхочо дӀадахийтар боахама эшаш долча хӀаманна, предприяте цхьацца йолча моттигашка ший болхлой къахьегама бокъонаш терко йоацаш ют. Прокуратура ший болх дӀабихьачул тӀехьагӀа деррига декхар дӀаделар болхлошта, укх шера тушола бетта.
Карарча хана уголовни гӀулакх дӀаденнад ГӀалгӀайчен Магасерча суде тахка аьнна, цига боагӀаш бола бехк бергба цу харцонна.
