Гуржий къаман культуран Ди дӀадихьар вай мехка
12.08.2024 21:24
Миннаца хьалхале лелаеш, Гуржий къаман культуран Ди дӀадихьар вай республике. Къамашта юкъера бувзам, барт чӀоагӀбара тӀехьа дӀайихьа кхетаче яр из. Из хоам «Сердалога» бир мехкарча миннацера.
«ГӀалгӀай мехка бахаш болча гуржаша гойтар, къаман Ӏадатацара тайп-тайпара даараш кийчду болх. Кхачех дизза латтача истола гонахьа хайшача бе-беча къамех болча наха дийцар, вӀаший юкъера бувзам чӀоагӀбарах, хоза гӀулакхаш доаржадарах»,- йоах газетага бенача хоамо.
Цу дийнахьа цар массане хьагойтар, беркатедар доаржадеш баха лаьрхӀа болга, ГӀалгӀайчен юкъарча вахаре шоаш дакъа лоацилга. Къамий культурай оагӀонашцара Ӏадаташ лорадар, лоалахошцара барт лоархӀаме хеталга да.
