Гӏалгӏай мехка дӏадихьар СВО доакъашхой, цар дезал тӏаэца Цаӏ дола ди
Гӏалгӏай мехка дӏадихьар Цаӏ дола лаьрххӏача тӏема операце доакъашхой, Россе Донбасс лораеш латта, иштта цар дезал тӏаэца ди. Магас шахьара администраце нах тӏаэцара болх вӏашагӏболлар хьалхадаьккхар вар Халкъа Гуллама унахцӏенон, социальни политикан, тӏема ветераний, иштта СВО доакъашхой гӏулакха йолча комитета кулгалхочун гӏонча Олиганаькъан Бадрудин.
Нах тӏаэцаш, техкар кхайкаралаш; социальни новкъостала доагӏаш дола лаьтта далар, кхыдола новкъостал, СВО доакъашхошта хьожадаь дола, иштта наха дукхагӏа дагайоахкаш йолча кхыча бокъоний оагӏонаш.
«Лаьрххӏача операце бӏухой терко яр, цар дезалий хьашташ кхоачашдар, - керттера декхар лоархӏаш да вай ӏаьдал. Цу даькъ тӏара болх дӏахо дӏахьоргба», - аьлар Олиганаькъан Бадрудина «Сердало» газетага.
Кхетаче дӏахьош, наьха таро яр ӏаьдала болхлочунга шоай хаттар дала, цунна лерттӏа тохкам бе. Цу тайпара хьалаш хиларо таро лу хаттараш дика кхоачашде наьха. Хьабаьхкача наьха хаттарашта доагӏаш дола жоп делар.
