«Эггара толашагӀа вола паччахьалкхен кхелахо» яха яхьаш дӀайихьар мехка
Респбликерча прокуратуре дӀайихьача яхьашка хержар эггара дикагӀа ший болх дӀахьош вола кхелахо (прокурор). Кхетачен керттера декхар - къонача болхлошта масал гойтар, цу наьха кхетам лакхбар.
Яхьашта хьалха лаьттар вар республикерча прокурора гӀонча Хазбенаькъан Гирихан. Масса кхалешкара болхлой гулбелар яхьашка дакъа лаца. Из хоам «Сердалога» бир цу моттигера. Росси бокъонаш лораярцара шоай кхетам малагӀча боараме ба хьежар гулбеннараш.
Геттара хала лоархӀаш долча гӀулакхех бехк бар дувцаш къамаьл дир цар комиссена хьалхашка. Эггара дикагӀа вола болхло ва, аьнна, белгалвир Шолжа кхален прокурора гӀонча вола Хаматханаькъан Муслим, шоллагӀча моттиге айттар ЖӀайрахьа кхален прокурора гӀонча Клочко Андрей, МагӀалбикерча прокурора гӀонча ТӀолданаькъан Акроман.
КхоалагӀа моттиг кхаьчар Наьсарен кхален прокурора гӀонча волаш къахьегача Оздой Хьусена. Хаматханаькъан Муслим цу тайпарча ерригача Россе яхьашка дакъа лоацаш хургва. Республикерча прокурора белгалбергба хьалхабаьннараш а.
