«Довза хьай дин» яха яхьаш дӀайихьар вай мехка
Дешареи Ӏилмани гӀулакхех йолча Министерствоc эггара хьалхара «Довза хьай дин» яха яхьаш дӀайихьар дешархошта юкъе. «Дина истори» яхача дешара дакъа доаржадара, хьаллацара тӀехьа дӀахьош бар из беркате болх. «Сердалога» из хоам бир цу моттигера. Котбаьннараш хьакхайкабир укх деношка.
Хьалхара моттиг кхаьчар Эбарга-Юртарча № 4 йолча ишкола, шоллагӀча моттиге Шолжа-Шахьарера № 7 йола ишкол хилар, кхоалагӀа моттиг Эккажкъонгий-Юртарча № 4 йолча ишкола дешархошта елар.
Берашта совгӀаташ дӀалуш хиннар дешареи Ӏилмани гӀулакхех йолча Министерствонна хьалха латта Цхьорой Ахьмад-Башир вар. « Дипломаши лоархӀаме совгӀаташи луш; белгалбир хьехархой, дешархой. Цул совгӀа, цар дӀабихьача балха лакха мах оттабеш, ахчан совгӀаташ делар хьехархошта иштта лоархӀаме къахьегарах», - дийцар тхога министерстве.
