«Гаьнарча малхбоален котало» яха дешархошта лаьрхӀа ловзар дӀадихьар вайцига
Наьсарерча гӀалгӀай къаман сийлен, дагалоаттама Мемориала доазон тӀа «Гаьнарча малхбоален котало» яха квест-ловзар дӀадихьар. Из вӀашагӀделлараш МКЖР яр, хӀаьта доакъашхой - Шолжерча №6 йолча ишкола дешархой. Бераш бархӀ даькъах латта декхар кхоачашде дезаш дар, сийлахьча Даьймехка истори шоашта довзаш хилар хьагойташ.
«Ловзар дӀадолалуш, Мемориала болхлоша балха декхараш хьалхадаьхар, бе беза болх дӀабийкъар тоабашта. Ловзар дӀахьош, хаттарашта жоп даларал совгӀа, йоаеш йола ха а дӀалоархӀаш яр - сихагӀа декхар кхоачашдар Ӏаткъаш дар коталонна.
Квеста декхарех котъяьлар «Эрудиты» яха тоаба, шоллагӀа моттиг «Котало» яхача тоабан доакъашхоша яьккхар. Котбаьннарашта дипломаш, кубкаш елар», - аьлар «Сердало» газетага из болх вӀашагӀбеллараша.
Исторех дола ловзараш кагирхошта юкъе дӀахьош хилар бахьан дар, дӀахо истори Ӏомадар, иштта кхувш йоагӀача тӀехьенна Даьхенцара безам совбоаккхаш бола кхетам балар.
Цу тайпарча кхетаченаша новъостал ду культурно-исторически тӀехьале лорае, лоархӀамеча исторически хьала, юкъарлонна терко тӀаоза, российски истори дикагӀа довза.
