ГӏалгӀай мехка хилар ДаьттагӀа яхача юрта хетаяь Ӏилман-практически кхетаче
«ГӏалгӀайчен юртий овлаш тахкара» проекта чуйоагӀаш, Ӏоахарганаькъан ЧхьагӀа цӀерагӀча Ӏилма- тохкама институте дӀайихьар Ӏилман-практически семинар, из яр «ДаьттагӀа яхача юрта мехка исторен а культуран а чухьара моттиг: дӀаяха, хӀанзара, хургйола зама» яхача темах, яхаш, дийцар «Сердало» газетага из болх вӀашагӀбеллараша.
Проекто могаду республикан юртий доазонаш, уж хьаяьнна бахьанаш, истори довзар. Кхетаче йолча вӀашагӀкхийтар Ӏилман болхлой, культуран викалаш, политикаш, журналисташ, Шолжа кхален администраце болхлой. ЛаьрххӀа бола хьаьший хилар цига - ДаьттагӀара хьабаьнна нах.
ИнгНИИ кулгалхочо Оздой Джамбулата йир «Бовзаш бола юкъарлон-политически викалаш - советски ханарча ДаьттагӀара хьабаьннараш» яха доклад, цу тӀа белгалдора наггахьа мара книжкаш а архивни материалаш а цар цахилар. Цо къамаьл деш керттера белгалдаьр дар, цу юртара хьабаьнна цу ханашка гӀулакхе а болаш дукха нах хиннилга. Цо яхачох, ГӏалгӀайчен вахара юкъе цу наха культура, экономика дегӀайоалаеча дукха къахьийгад.
«ИнгНИИ» ГБУ исторе отдела Ӏилман воккхагӀа волча болхлочо Кхоартой Мухьмада иштта ДаьттагӀа хетадаь дийцар ший къамаьл. Цо дувцачунна тешал деш дар исторически сурташ, архивни каьхаташ цох долаш хилар.
Цул совгӀа, цига доклад йийшар института гӀалгӀай фольклора, этнографе отдела болхлочо Хайранаькъан БейӀаьлас, юртарча сийленгий архитектурах лаьца. Цунца цхьана цо дийцар тӀеххьарча тохкамех, археологе даькъ тӀа корадаьчох.
Семинаре хьежар моттигерча доазонга; сомаш, баьцадаараш леладеш хилар а белгалдир ДаьттагӀа бахача наха, иштта кердадаьккхар, Сийлахь-боккха Даьймехка тӀом латташ, цигарча наха шоашкара доккха дакъа юкъедихьа хилар.
