«Дагалоаттама беш» яха болам дӀахо дӀахьош ба
Укх деношка, МагӀалбикерча №18 йолча ишколе, дӀабихьар «Дагалоаттама беш» яха Даьхенцара безам совбоаккхаш бола болам. Цу юкъарча гӀулакха юкъе дакъа лоацаш хилар ГӀалгӀай Республике гӀолла йолча «Даьхен лорбой» оалача ганза болхлой, яхаш, дийцар «Сердало» газетага цига хиннача доакъашхоша.
«Кхетачен чудоагӀаш, юкъарча ишколан даькъ тӀа 1000 къоахка, миха гаьнаш дӀаегӀар. ХӀара шера 1941-1945 шерашка Сийлахь-боккха Даьймехка тӀом латташ байнача турпалхошта хетаю уж, цо чӀоагӀбу доккхагӀа долча ноахалаи (тӀема ветеранашта) хӀанзарча тӀехьеннеи (студенташта, дешархошта) юкъера бувзамаш.
Советски халкъа карагӀдаьннар дагалоацаш, МагӀалбикерча №18 йолча ишколе иштта баьхкабар СВО доакъашхой, юкъарча балха латтараш, культуран, политикан викалаш»,- йоах хоамо.
Белгалду, «Дагалоаттама беш» вай мехка дӀаювш я, 2020 шера денз. Из болх вӀашагӀбеллараш лаьрхӀачох, 27 миллион га я дӀайогӀа езаш, тӀема шерашка байнарий сийна.
