ТIема доакъашхошца кхетаче хилар кагирхой
Кагирхой политикахи туризмахи йолча Министерство гIо деш, «Тхо - котбаьннарий тIехье» яха денала урок дIайихьар «Даьхе лораераш» яхача ганза филиала болхлоша. ТIема ветеранашца кхетаче хилар Магасе. Из хоам «Сердалога» бир министерствос.
«ХьатIадоагIача 9-ча дийнахьа дездергдолча Коталон цIайна хетаяь яр кхетаче. «Беркут-Юг» яхача ОМОНа воккхагIа волча психолога Доврбиканаькъан Хьасана кагирхошта дийцар, тIема доакъашхошца психологаша беча балхах, цунна юкъе лоархIамедарех. Суда пирстопий оагIон болхло волча Бештой Йоакъапа дийцар тIема доакъашхошта, цар цIагIарбарашта юридически оагIонцара новкъостал лоаттадарах.
ТIема операце дакъа лоацаш хиннача Бохтаранаькъан Батыра дийцачох, кагирхоша кхетадир, мел халонаш такха езаш хул бIухой», - йоах тхогарча хоамо. «Даьхе лораераш» яхача ганза кулгалхочун гIонча йолча Новрбенаькъан Фаинас дийцар хIара денна шоаш беча балхах, шоашта хьалхашкарча декхарех.
«Денал долча нахагара масал эца ловш хул кхувш латтараш. Царех лаьца дувца деза царга массахана. ТIема ветераний цIераш, цар истори довза декхарийла да вай дерригаш, тIехьа тIабоагIарашта а хьалхадаха деза из»,- белгалдир Новрбенаькъан Фаинас.
