Мехка бахархоша дагалоаттама зизаш дехкар Москван юхерча Красногорске, террористий кулгах байнарий дагалоаттама; байнарий, лозабаьрий дезалашка кодам а бийцар, уж дӀайхача дешашца хьал а лаьцар.

«Цу унзарча сурто хьагойтар, моастагӀий вай кхераде, дохаде гӀерташ хилар. Бакъда беррига Россе бахархой кхотабир цига нийсденнача хатаро. Тахан вайх хӀаранена хала хеташ, нийсденнад из, цига бехк боацаш байна нах дагабоахк вайна. Из зулам даьраш меттел, из дагадехараш а юстара бусаргбац, доагӀаш дола таӀазар ца деш. Цхьаккха тайпара хила йиш йолаш хӀама дац из, цудухьа хала да из хьатӀаэца», - аьлар «Сердало» яхача Кепайоазон цӀен директора Курскенаькъан Хадижата.

Къаман юкъарча таьзета вӀашагӀтехар тайп-тайпара ха яьнна а балхаш деш бола а нах, цар хьагойт вай цӀагӀа чудена во, вай юкъара хатар долга.