Лазертагах йола яхьаш дӀайихьар МагӀалбике
27.08.2025 11:57
Лазертагах йолча яхьашка дакъа лоацаш хилар вай къона спортсменаш. «Мужече» яхача спорта кийчо еча моттиге, дӀадихьар из гӀулакх. Шоай говзал ма ярра гойта дика аьттув бар из доакъашхошта.
«Ловзара сценарех чакхъяла езаш яр хӀара тоаба. Боккъонца долаш санна, вӀашагӀбелла бар из болх, доакъашхой сиха, кадай хьовзаргболаш. МоллагӀа сихонца де дезаш хӀама нийсделча, шоаш мел кийча ба гойтар къонабараша. ВӀаший хьаллоацаш, тоабашца дӀахьош гӀулакх дар из», - дийцар «Сердалога» турнир дӀахьош хиннараша. Спортсменаша бӀаргадайтар шоаш кадай хилар а говзал а.
Дуккхача кагирхошта яхьаш хинна Ӏацар лазертаг, шоай дегӀа низ, говзал малагӀча боараме я тахка аьттув бар цар цига.
