Гӏалгӏай мехка сийрда кхетаче дӏайихьар, Халкъашта юкъерча ашарий денна хетаяь
Гӏалгӏайчен паччахьалкхен искусствон колледже цӏай хилар; ашараш, иллеш халкъа искусство мел езарашта, из хетадаь дар Халкъашта юкъерча ашарий денна. Цӏайна хетадаь концерт хьадийллар начӏал долча концертмейстера Тӏумхой Джамиляс Н. Метнера «Канцона- серенада» лакхарца. Гулбеннарий безам тӏаозаш болча балхá лакха мах оттабе ловш бар юххьанца.
«Концерте дакъа лоацаш яр халкъа инструментий ансамбль, цо пандар хьалха локхаш композитора Шаталова концерт делар. Солистка йолаш, пандар лекхар Боканаькъан Хьавас. Укхаза иштта хьахозаш яр ший тайпара Хамхой Азай композици «Иразга вуга никъ», хӏаьта цун «Мишта гӏоргья со сихача хи тӏа» яха илли зале мел ваьгӏачоа дагайохийташ дар дӏаяха ӏадатий ханаш. Кхы кӏезигагӏа безам тӏаозаш дацар Эсамарзанаькъан Айгуфас дӏааьнна «Вальсок» яха илли а», - аьлар «Сердало» газетага цӏайна лаьрхӏа хинна кхетаче вӏашагӏъеллараша.
Концерта программанна чудоагӏаш дар тайп-тайпара ашарий кхолламаш; классика хозаленашкара таханарча заман композицешка кхоачаш. Колледжа студенташа гойтар шоай начӏал тайп-тайпарча жанрашка, ла дувгӏаш хиннарашта дицлургдоаца куцаш гойташ.
Хӏара гойтам бар безам тӏабодаш, бицлургбоацача кепара кийчбаь бар, ший тайпара уйлангахьа вугаш. Студентий говзало боккъонцахьа йола искусство хьакхеллар.
Гӏалгӏайчен паччахьалкхен искусствон колледж дӏахо а мукъамца, ашарца, иллеца безам бола саг тӏаозаш йола центр я.
