Кхааш ийдара духьалара болам дӀабихьар вай мехка
20.08.2025 12:11
Кагирхой гӀулакхех йолча комитето вахара оагӀонцара болам дӀабихьар мехка. Къонача тӀехьенга кхааш ийдар мел во гӀулакх да дӀахьокхаш, цу хӀаман духьала цар къовсам лоаттабергболаш дӀахьош яр кхетаче.
«Тахан кхувш латтарашта из ийрча хӀама цӀаккха а маьрша далийта йиш йоацилга дӀагойташ бар болам. Из деррига белгалдеш дола каьхаташ дийкъар кагирхошта», - дийцар «Сердалога» болама доакъашхоша.
Къонача тӀехьенна хьалхадаьккхар, кхааш ийдар яха во, ийрча гӀулакх вайна юкъера хаьдда дӀадала дезилга, теркал ца деш из хӀама дита йиш йоацилга. ГӀалгӀай мехкара кхааш ийдар дӀадаккхара тӀехьа дӀахьош, лоархӀаме болх бар из.
