ГӏалгӀайче Марха доасташ берий сайре дӀайихьар
30.03.2025 08:00
ГӏалгӀай Республикан «Даьхен лорбой» ганзо, «Дикача наьха Клубо», КъорӀа хьехаш йолча Овшанаькъан Мединас бусалба наьха Мархаш оала цӀай хьатӀадоагӀаш, шоаш тӀахьожам лоттабераш гӀадбигар, яхаш, дийцар «Сердало» газетага из болх вӀашагӀбеллараша.
«Къаьстта йолча сайрийна дийхар ЛаьрххӀача операце доакъашхой 150 бер, иштта могашал яйна бераш, да-нана доацараш. Программа дӀахьош, зӀамигача хьаьшаша викторинашка гойтар шоашта ховш дар. Укх шерара тӀеххьара ифтар йистедаьлар шатлак ашца», - аьлар «Даьхен лорбой» ганза юкъарлонца бувзам лелабеш йолча Джанхотанаькъан Мадинас.
Белгалду, мецената Беканаькъан Хьасана, иштта «Чингиз» клуба спортивни кулгалхочо Бӏарахой Джабраила ахчанца гӀо дир цига, дезалашта кхачан продукташ, мерза даараш делар.
