Къоаст яхача гӀалай моттиге тохкама болх дӀахьош ба
Къоаст яха гӀалай шира юрт улл ЦӀай-Лоама дукъ тӀа, Кхаьрта къулбехьа. ЖӀайрахьа-Ахабоарзен музея-заповедника зарбан болх лелабераша яхачох, карарча хана моттиг латт культуран тӀехьален 52 гӀишлох. Уж я 3 ах тӀема гӀала, 13 вахара гӀала, 5 лаьттах доахка малхара кашамаш, 16 лаьттан кӀалхара кашамаш, 4 ах лаьттах доахка кашамаш, 9 кхерах яь гӀишло, 2 боахамера гӀишло. Еррига гӀишлош наьха мо ехай.
«Комплекса ах тӀема гӀалаш, шоаш юххьанца хиннарех 80% кхоачаш ца харцаш йисай, дукханахьара ийттӀа я, тӀера тховнаш а дац, дукха дийлхача догӀаша кӀийле а бесазъяьккхай.
Вахара гӀалаш ца йохаш йисай 40-90%, тӀера тховнаш доацаш да. № 2, №3 йолча вӀаший юхе ягӀача гӀалай ца харцаш диса пенаш да 9-10 метр. Иштта хоалуш да вӀашагӀхоттара бола юкъера маркхал боацаш хилар, кхертӀой Ӏолийга хилар, къулбехьен-малхбоален миӀинг Ӏохаьрца хилар, са чакхдоагӀаш ийттӀа хилар. Малхбоален-къулбехьен оагӀув 7х7 м я. къилбаседа-малхбузехьара пен 9х7м. Пений шорал да 65 см. Цхьацца йолча моттигашка вахара гӀалаш овлангара денз Ӏохаьрца я, цхьайола оагӀув ше хиннача лакхалга гӀорташ латташ я. Из йохара бахьан да - кӀийле хаьрца хилар.
Малхара кашамаш, йиъ оагӀув йола лагӀаш а долаш, биъ са болаш кӀийле йолаш (3,75х3,85) да, къилбаседа-малхбоален малхарча кашамий са бехаб.
Лакхал - 7,20 м. Тхов 16 сланца лагӀаш долаш бисаб ца бохаш. Кхы а лаьттара малхара кашамаш ца дохаш дисад 80-95% гӀишлон даькъах, 3 - йисай 70%. Хьал чоалхане да. Ӏохаьрца яьнна гӀишлош 20% мара йисаяц юххьанца хьалъяь хиннарех», аьлар «Сердало» газетага музее-заповеднике.
