ГӏалгӀай лоаме Сампай-Чӏуг яхача ердага хьежар
АргӀанара болх дӀахьош, Жӏайрахьа–Ахабоарзен музея-заповедника болхлоша тохкам бир Сампай-ЧӀуг яхача ерда, из я Чуранаькъан тӀема гӀаланна 200 метр гаьна, яхаш, дийцар «Сердало» газетага ара юкъе кхеллача музея зарбан болх лелабераша.
Ердо ший хьалха хинна кеп еррига а йоаяьй ала йиш йолаш да цун хьал. Укх деношка цига болх беш хиннача музея болхлоша яхачох, гӀишлон тӀера тхов беррига хаьрцаб, пенаш а иштта чухаьрца дала доахк. Харцанза дисача пений лакхал 1,20 метр я. Шорал уж да, 55 - 60 см кхоачаш. Кӏалхара кӀийле - 7,25 кв м.
1981 шера, Мужахой М. кулгалца цу ерда тӀа археологически болх дӀабихьабар, цига дукха сагӀийна доадаьча хьайбай тӀехкаш, бухьера ира дола тӀаьскаш корадир.
«Лоаман ГӏалгӀайчен къаьнарча ханашка» яхача ший книжка тӀа Чахкенаькъан Д. язду «динца ювзаенна гӀишло хетаяь яр цӀен кхуврч лорабечунна».
Музея-заповедника болхлоша де деза балхаш ду цига тахан, еза лоархӀаш хинна Сампай-Чӏуг ГӏалгӀайчен культуран тӀехьален гIишлошта юкъеяхьара.
